Urtebetean, erregaiak % 21 garestitu dira

Espainiako Estatuan erregaien prezioak gora egiten jarraitu du aste honetan, eta % 0,57ra igo da aurreko astearen aldean; hala, urteko maximo berrietara igo da, eta duela urtebete baino % 21 garestiagoak izan dira.

Zehazki, berunik gabeko 95 gasolina litroaren batez besteko prezioak zortzigarren igoera izan du jarraian (+% 0,57), 1,408 eurora iritsiz, eta maximoetan kokatu da 2014ko irailaren amaieratik, Europar Batasuneko Petrolio Buletinaren datuen arabera. Bestalde, gasolioaren prezioak ere goranzko joera bera du, eta aste honetan hamabigarren igoera izan du (+% 0,39), litroko 1,267 euroak ukitzeko, 2018ko azarotik ikusten ez zen mailan.

Bi erregaiek kobid aurreko maila berreskuratu zuten eta orain nabarmen gainditu dituzte. Urtea hasi zenetik, gasolina-litroaren batez besteko prezioa % 17,4 garestitu da, eta gasolioarena % 16,7 igo da.

Duela urtebeteko prezioei dagokienez, kobidaren konfinamenduagatik deseskalada prozesua hasita zegoenean, gasolina-litroaren prezioa ia % 21 garestiagoa da orain, eta gasolioarena, berriz, % 19,5 garestiagoa.

Erregaien prezioek azken hilabeteetan izan duten igoera hori petrolioaren nazioarteko prezioa suspertzearen eskutik etorri da. Hala, Brent kalitatezko petrolio upelaren prezioa, Kontinente Zaharrarentzat erreferentziazkoa, 72,59 dolarrekoa zen atzo, eta Texas, Ipar Amerikan erreferentziazkoa, 70,72 dolar ingurukoa zen, duela astebete baino bi dolar gutxiago.

Igoera hori gorabehera, prezioa EBko batez bestekoaren azpitik dago (1,54 euro gasolina-litroa eta 1,37 euro gasolioarena), nahiz eta BEZaren igoerak, zerga handiagoak eta biodieselaren gaineko kargak izan; izan ere, Estatuak, oro har, erregaien gaineko presio fiskal txikiagoa izaten jarraitzen du Erkidegoko batez bestekoak baino.