BBVAk lan-eredu hibrido eta malgua ezarri du, eta zerbitzu zentraletako langileek denboraren % 60 bulegoan egiten dute lan, eta % 40, urrutian.

Telelanaren eredu partzial hau 2021eko irailaren 1etik dago martxan. Langileek jada ez dute mahai finkorik bulegoan; aitzitik, app bat dute, aurrez aurre lan egiten duten egunetan beren lanpostu fisikoa erreserbatzeko, hau da, mahai beroen edo ‘hot desking’ aren eredua.

Desiree Granda BBVAko Higiezinen eta Zerbitzuen arduradun orokorrak azaldu duenez, bankuko egoitzetako postuen erdiak ezin ziren erabili urruntze sozialaren neurrien ondorioz, pertsonen artean metro eta erdiko distantzia mantendu behar zelako.

Enplegatuek aurrez aurreko lanari berriz ekiteko modua lanpostuak berresleitzea zen, eta, horregatik, beharrezkoa izan zen lanpostuen kudeaketa dinamikoa ahalbidetuko zuen tresna bat izatea.

Horrela, tiraderak kendu dira eta langile bakoitzak bere gauzak gordetzeko txarteltxo bat du esleituta. Sistema horren onuren artean, BBVAk espazioen aprobetxamendua eta optimizazioa nabarmendu ditu, “Ez baita eraginkorra lanpostu bat hutsik uztea beteko ez diren egunetan”.

Pandemiaren aurretik ere, egunero, langileen lan bidaia, prestakuntza edo oporrengatik esleitutako lanpostuen % 15 hutsik geratzen ziren, BBVAren arabera.

“Sistema honek aukera ematen du eraginkortasun falta horiek aprobetxatzeko eta espazio hori askatzeko, elkarlanerako eremu gehiago sortzeko eta lan egiteko modu berrietan hain beharrezkoak eta eskatuak diren harremanetarako espazioak sortzeko”, azpimarratu du Grandak.

Irailean hasi den etapa berria pandemiaren bilakaeraren arabera egokitzen joango da, baina BBVAk azpimarratu duenez, etorkizuneko lan-ereduek “hibridoak eta malguak” izan behar dute.

Egilea Andoni Beitia