Eusko Jaurlaritzako Ekonomiaren Garapen, Jasangarritasun eta Ingurumen Sailak ezohiko aldi baterako laguntzen deialdia ireki du hilaren 19ra arte, 12 milioi euroko zuzkidurarekin, esnetarako behien, haragitarako behien, ardien, ahuntzen, haragitarako hegaztien, txerrien, untxien eta zaldien sektoreetan abeltzaintza-jarduerari eusten laguntzeko.

Diru-laguntza horiek covid-19aren testuinguruan Estatuak emandako laguntza-neurrien aplikazio-eremura egokitzen dira, eta 12 milioi euroko zuzkidura dute, Eusko Jaurlaritzaren aurrekontuen kargura.

Gobernuak azaldu duenez, pandemiak “asaldura handiak” eragin ditu hainbat elikagai-produkturen merkatuan, eta abeltzaintza-sektorea “ez da errealitate horretatik kanpo geratu”.

Ildo horretan, adierazi du osasun-krisiak “gogor” eragin duela euskal haragi-ekoizleen sektorean (behiak, ardiak, hegaztiak), krisi ekonomiko batean horrelako produktu bati irtenbidea emateko dauden merkataritza-zailtasunengatik. Esnearen sektoreak ere eragin negatiboa izan du, eta esnearen salmenta-prezioak ekoizpen-kostuak baino txikiagoak izan dira.

Eusko Jaurlaritzak 2020an elikaduraren balio-katera bideratutako ezohiko laguntza ekonomiko batzuk onartu zituen arren, abeltzaintza-sektoreak egoera “konprometituan” jarraitzen du, eta, Jaurlaritzak zehaztu duenez, egoera hori “areagotu” egiten da “jasotako prezioen pixkanakako beherakadagatik eta kostuen igoeragatik”.

Hori dela eta, Jaurlaritzak abeltzaintzako ustiategiei zuzendutako laguntza-lerro hau jarri du abian, ekonomiaren, gizartearen eta ingurumenaren ikuspegitik sektore “estrategiko” baten egoera arintzeko.

Agindu honetan deitutako laguntzen onuradun izan ahalko dira pertsona fisiko edo juridiko pribatuak, edozein forma juridiko dutela ere; esnetarako behi-azienda, haragitarako behi-azienda, gizentzeko behi-azienda, ardi-azienda, ahuntz-azienda, txerri-azienda, hegazti-azienda, zaldi-azienda eta untxi-hazkuntzako abeltzaintza-ustiategiak. Eskabideak Euskal Autonomia Erkidegoko Administrazio Publikoaren egoitza elektronikoan sartuta aurkeztuko dira.

Egilea Andoni Beitia