Euskadiko bostehun bat gaztek enpresa-praktikak egingo dituzte atzerrian, Spri Taldearen Global Training bekei esker. Aurten 6,25 milioi euroko aurrekontua izan dute.
Ikasle horiek guztiak unibertsitateko edo goi-mailako LHko tituludunak dira, eta asteazken honetan jaso dituzte bekak, Donostiako Miramongo teknologia-parkean egindako ekitaldian. Bertan izan dira, besteak beste, Ekonomiaren Garapen, Iraunkortasun eta Ingurumeneko sailburu Arantxa Tapia eta SPRI taldeko zuzendari nagusi Aitor Urzelai.
Onuradunek 30 urtetik beherakoak izan behar dute, eta 1.530 euro gordin jasoko dituzte hilero urte erdian, baina bekak urtebetera arte luzatu ahal izango dira (batez besteko egonaldia zortzi hilabetekoa izango da).
Ziurtagiria jaso duten gazteek bost kontinenteetako 55 herrialdetako “lehen mailako” 330 enpresa eta erakundetan baino gehiagotan egingo dituzte praktika profesionalak, hala nola Fraunhofer Institutuan, Microsoften, Harvard Medical Schoolen eta NBE Emakumeak-en, SPRIk ohar baten bidez jakinarazi duenez.