Barne Produktu Gordina (BPG) % 1,6 hazi zen aurtengo lehen hiruhilekoan, 2023ko aldi berarekin alderatuz gero, eta % 0,5, ekitaldi horretako azken hiru hilabeteekin alderatuta.
Euskal Estatistika Erakundeak (Eustat) hiruhilekoko kontuen aurrerapena argitaratu du, eta ekainaren 7an handituko du, produkzio-sektoreetatik bereizitako informazioarekin.
Euskadiko ekonomiaren urte arteko hazkunde hori Eusko Jaurlaritzak azken aurreikuspen makroekonomikoetan aurreikusitakoa baino bi hamarren handiagoa da. Hiruhilekoen arteko hazkundeari dagokionez, 2023ko laugarren hiruhilekoaren berdina da (% 0,5), urte horretako hirugarrenaren aldean.
Zerbitzuen sektorea, buru
Aurrerapen hori egiteko unean Eustatek erabilitako informazioaren arabera, BPGren urte arteko bilakaera positibo hori, funtsean, zerbitzuen sektorearen martxa onean oinarritzen da.
Enpleguari dagokionez, lanaldi osoko lanpostu baliokidetzat neurtuta, aurtengo urtarriletik martxora % 2 hazi da iazko aldi berarekin alderatuta, eta % 0,5 aurreko hiruhilekoarekin alderatuz gero.
Urte arteko hazkunde hori Ekonomia eta Ogasun Sailak hilabete horietarako aurreikusitakoa baino hamarren bat txikiagoa da.
Ziurgabetasuna
Joan den apirilaren 2an, Eusko Jaurlaritzak beherantz berrikusi zituen aurtengo BPGaren hazkunde-aurreikuspenak, % 1,9an finkatu baitzuen, aurreko urteko irailetik ordura arte izandako koadro makroekonomikoan baino bi hamarren gutxiago.
Ekonomiaren hazkunde-aurreikuspenen berrikuspen hori egiteko, Eusko Jaurlaritzak Euskadiko BPGaren % 1,8ko hazkundea hartu zuen kontuan iaz, Jaurlaritzak berak aurreikusitakoa baino hamarren bat gehiago.
Orduan, Eusko Jaurlaritzak aurreratu zuen lehen hiruhilekoaren martxak baldintzatuko zuela EAEko ekonomia 2024an, “ohi baino ziurgabetasun handiagoa” baitzegoen horren gainean.
Seinale ona
BPGren hazkundearen bi hamarreneko hobekuntza hori seinale ona izan liteke Euskadiko ekonomiaren urte honetako azken bilakaerari begira, nahiz eta Eusko Jaurlaritzak jada aurreikusten zuen hurrengo hiruhilekoetan BPGa urtarrila eta martxoa bitartean egin duena baino gehiago haziko zela.
Egungo aurreikuspen makroekonomikoetan, Eusko Jaurlaritzak uste du Euskadiko ekonomia % 1,7 haziko dela bigarren hiruhilekoan, % 2 hirugarrenean eta % 2,2 laugarrenean.
Eustatek bere aurrerapenean baieztatzen duen bezala, zerbitzuen sektoreak Euskadiko ekonomiaren hazkundeari tiraka jarraituko du; izan ere, iaz % 2,4ko hazkundea izan ondoren, hurrengo ekitaldietan % 2tik gora hazten jarraitzea espero da.