Javier Hurtado Turismo, Merkataritza eta Kontsumoko sailburuak jakinarazi duenez, turisten sarrerak % 16 gehitu dira joan den uztailean 2019ko hil beraren aldean, pandemia hasi aurreko azken urtean, eta aurten 2019ko lehen zazpi hilabeteetan baino % 5,5 gehiago metatu dira. Bere ustez, “Oso albiste onak” dira “oso gaizki pasatu duen” sektore batentzat, eta udarako aurreikuspenak berresten ari da.
Sailburuak Lekeition eta Lea Artibai eskualdean Next Generation funtsekin finantzatutako proiektu turistikoetan izandako aurrerapenen aurkezpenean parte hartu du astelehen honetan, eta jardunaldi honetan ezagutzera eman diren uztailean Euskadiko hotel-establezimenduetan izandako sarreren datuak baloratu ditu.
Hurtadok azpimarratu duenez, Eustaten estatistikaren arabera, hotel-establezimenduetako turisten sarrerak % 16 hazi dira uztailean 2019aren aldean, eta, horrela, 2022ko lehen zazpi hilabeteetan “turismoa % 5,5 hazi da” pandemiaren aurreko urtearen aldean.
Sailburuak nazioarteko turismoaren susperraldi “oso garrantzitsua” azpimarratu du, uztailean bisitarien ia % 50era iritsi baita, nahiz eta “pandemiak gehien kaltetutako” kolektiboa izan.
Bere ustez, “Oso albiste onak” dira “oso gaizki pasatu duen eta udarako aurreikuspenak datu oso onekin berresten ari den sektore batentzat”.