Zazpi enpresa-erakundek bat egin dute manifestu bat egiteko, industriaren orainerako eta etorkizunerako lehentasunezko neurriak biltzen dituena, eta Nafarroako Gobernua egiten ari den industriaren legean sartzea bilatzen duena.
Dokumentuak lau multzotan biltzen ditu bere proposamenak: azpiegiturak; enpresen eta administrazioaren arteko harremana; fiskalitatea; eta pertsonak eta errotzea.
Kolektibo horietako ordezkariek Mikel Irujo Industria, Trantsizio Ekologiko eta Digitaleko sailburuarekin bildu dira, manifestu hori emateko.
Zazpi enpresa-erakundeak
Nafarroako Enpresarien Konfederazioak (CEN), Nafarroako Industriaren Elkarteak (AIN), Nafarroako Merkataritza, Industria eta Zerbitzuen Ganberak, Nafarroako Familia Enpresa Garatzeko Elkarteak (ADEFAN), Nafarroako Nekazaritzako Elikagaien Kooperatiben Batasunak (UCAN), Institución Futuro (IF) eta Nafarroako Eraikuntzaren Industrializazioaren Klusterrak (ICONS) batera aurkeztu dute dokumentu hau, “trantsizio sakoneko une batean Nafarroako industria bultzatzeko eta indartzeko enpresa-munduak eskatutako neurriekin”, Carlos Fernández Valdivielso CENeko idazkari nagusiak esan duenez.
Neurriak
Proposamenen artean, erakunde guztiek defendatzen dute AHT eta Nafarroako Ubidea eratzea; administrazio arinagoa; leihatila bakarra berreskuratzea; enpresen garapenarekin eta enpleguaren sorrerarekin aberastasuna sortuko duen sozietateen gaineko zerga; talentua erakartzeko erakargarria izango den PFEZ; eta elkarrizketa soziala bultzatzea.
Nafarroako Enpresarien Konfederazioaren egoitzan aurkeztu zen dokumentu hori komunikabideen aurrean, erakunde horietako bakoitzeko kideak bertan zirela.
Ordezkariek esandakoa
Helmut Döllerer, Nafarroako Enpresarien Konfederazioeko lehendakariordea, azpiegituretan zentratu da. “Premiazkoa da bidaiari eta merkantzien Abiadura Handiko Trena eraikitzea. Nafarroak 233 milioi jaso ditu lan horretarako, eta Espainian trenbide horretarako bideratu denaren % 0,4 baino ez da”, esan du.
Esther Burgui Nafarroako Nekazaritzako Elikagaien Kooperatiben Batasuneko presidenteak Nafarroako Ubidearen bigarren fasearen eraikuntza defendatu du, “ezinbestekoa baita nekazaritzarako, industriarako eta herrietako landa-garapenerako”. Batez ere orain, klima aldaketarekin “ura oso ondasun preziatua bihurtzen delako”, defendatu du.
Luis Ilundain iCONS Klusterreko lehendakariordeak bere tresnak aldatzeko eskatu dio Administrazioari, enpresekiko kudeaketak hobetzeko. “Dokumentazio bera behin bakarrik aurkeztea eskatzen dugu, sail desberdinek eskatzen badigute ere. Gainera, funtsezkoa da lizentzien prozesuak murriztea eta jarduera-baimenak azkartzea”, laburbildu du.
Javier Tabernak, Nafarroako Merkataritza, Industria eta Zerbitzuen Ganberako presidenteak, enpresak sortzeko leihatila bakarra berreskuratu behar dela berretsi du, udal, autonomia, estatu eta Europako burokraziak negozio bat eratzeko asmoa kentzen baitie ekintzaileei. “Zentzuzko neurriak dira”, adierazi du.
Institución Futuro erakundeko Ramon Perezek “enpresei hazteko aukera emango dien sozietateen gaineko zerga eta talentua sortuko duen PFEZ” izatearen alde egin du.
Pachi Esparzak, Nafarroako Familia Enpresaren garapenerako Elkarteko idazkariak, enpresa-genea hezkuntzatik irakasteko ekimenak eta profil profesionalen beharra langabezian dauden pertsonekin egokitzeko neurriak proposatu ditu. “Helburua arrantzan irakastea izan behar da, eta ez jaten ematea”, azaldu du. Gainera, elkarrizketa sozialaren aldeko apustua egin du, “enpresek beren negozioak areagotu ditzaten eta kalitatezko enpleguak sor ditzaten”.
Azkenik, Ana Ursúa Nafarroako Industriaren Elkarteko zuzendari nagusiak azpimarratu du erronka handia dela talentuaren ekosistema garatzen jarraitzea eta gazteen belaunaldi oso bat prestatzea industria kontserbatzeko.
Orain, enpresa-erakundeen planteamendu guztiak aztertuko ditu Foru Gobernuak Industriari buruzko Legearen zirriborroa egin aurretik. Zirriborroak ez du neurri fiskalik jasoko, beraiek aitortu duten bezala.
Hala ere, kontuan hartzea espero dute, Nafarroako Gobernuak industriako mahaira deitu baititu euren ideiak entzuteko eta kontuan hartzeko.