Mikel Irujo Garapen Ekonomiko eta Enpresarialeko sailburuak Komunitate Energetikoen Europako bigarren Kongresuaren irekieran parte hartu zuen atzo goizean. Kongresu horrek 300 pertsona baino gehiago bilduko ditu bi jardunalditan, gaur, asteazkena, amaiera izango duena. Irekiera ekitaldian, Joan Groizard IDAEko zuzendari nagusiak ere parte hartu zuen, eta Irujok nabarmendu zuenez, “Nafarroako udalerrien laurdenak dagoeneko baditu edo ari da osatzen komunitate energetiko bat”. Lekunberri ere aitzindaria izan da energia-komunitate bat bultzatzen, baina bere industria-sarerako.
“Energia-komunitateak garapen geldiezina bizitzen ari dira, eta Nafarroako Gobernutik eskura ditugun tresna guztiak aplikatzen ari gara horiek bultzatzeko”, adierazi zuen kontseilariak. Zehazki, Irujok zehaztu zuen bultzada hori hiru ardatzetatik ematen dela. “Alde batetik, Energia Komunitateak sustatzeko Foru Agindua dugu, Estatuan aitzindaria den araudia. Bestetik, Next Generation funtsetatik eratorritako laguntzak daude, eta horri Nafarroako berezko zerga-kenkariak gehitu behar zaizkio. Eta, azkenik, udalerri, herritar eta enpresa guztien eskura daukagu komunitate energetikoei laguntzeko bulego bat”, Irujok azaldu duenez.
Figura berri horren gorakadarekin batera, autokontsumoa handitzen ari da Nafarroan. Sailburuak adierazi zuenez, “2020an instalatutako 31 MWtik gaur egungo 99 MWra igaro gara, eta horrek esan nahi du bi urtetan % 200 igo dela. Gainera, Energia eta Klimaren Plan Nazional Integratuak (PNIEC) 2030erako ezartzen zizkigun 54 MWen oso gainetik gaude”.
Kongresua
Astearte eta asteazken honetan ospatuko da Baluarteko Auditorioan Garapen Ekonomiko eta Enpresarialeko Departamentuak antolatutako Komunitate Energetikoen Europako Kongresuaren bigarren edizioa. Edizio honetan 300 pertsona baino gehiago izango dira eredu energetiko berri honi buruz eztabaidatzeko eta kasu arrakastatsuak ezagutzeko. Asteazkeneko saioetan, energia-komunitateen barruko gizarte-berrikuntza, finantzaketa publiko-pribatuko ereduak eta Estatuko eta Europako hainbat puntutako kasu arrakastatsuak ezagutuko dira.