Euskal AEko industri produkzioa, 2024ko martxoan, aurreko urteko hil berean lan-egutegiko baldintza homogeneoetan izandakoa baino % 2 handiagoa izan da; otsailarekin alderatuta, berriz, % 2,9 igo da, dagozkion urtaro-ondorioak zuzendu ondoren, Eustatek landutako datuen arabera.
Ondasunen helburu ekonomikoaren arabera, ekipo-ondasunen produkzioa (ibilgailu motordunen fabrikazioa, tren-makinen eta trenbide-materialen eraikuntza eta aeronautika edo ontzigintza) % 3,9 igo da, aurreko urteko martxoaren aldean.
Kontsumo-ondasunek ere urte arteko portaera positiboa izan zuten 2024ko martxoan, produkzioa % 2,1 hazi baitzen sektore osoan. Igoera hori kontsumo-ondasun ez-iraunkorren portaerak eragin du; izan ere, elikagaiak prozesatzeko eta kontserbatzeko jarduerak, garbiketarako eta higienerako produktuen fabrikazioa, produktu farmazeutikoak eta jantziak egiteko jarduerak daude bertan, eta % 2,9ko igoera izan dute.
Kontsumo-ondasun iraunkorren produkzioa, aldiz, % 1,9 jaitsi da. Azken horien artean altzarien eta etxeko tresnen fabrikazioa jasotzen da, besteak beste.
Bitarteko ondasunen ekoizpenean metalurgia eta produktu metalikoen fabrikazioa, industria kimikoa eta kautxuzko eta plastikozko produktuen fabrikazioa sartzen dira.
Energiaren produkzioa, bestalde, % 4,1 jaitsi da 2024ko martxoan, aurreko urteko hil beraren aldean. Sektore honetan sartzen dira energia elektrikoaren ekoizpena eta hornidura eta petrolioa fintzea.
Maila bereiziagoan, Euskadiko industrian pisu handiena duten sektoreen artean, 2024ko martxoan urte artean produkzioaren igoera izan dutenak ondokoak izan dira: garraio-materiala (% 8,1), makineria eta ekipoa (% 4,7) eta zura, papera eta arte grafikoak (% 3,4).
Aitzitik, urte arteko jaitsierarik handienak Energia elektrikoa, gasa eta lurruna (% 8,4) eta Kautxu eta plastikoak (% 2,1) sektoreetan kontzentratzen dira.
Industri Produkzioaren Indizearen urte arteko bilakaera, 2024ko martxoan, positiboa izan da hiru lurralde historikoetan. Gipuzkoan produkzioa % 4,2 igo da, Araban % 1,1 eta Bizkaian, azkenik, produkzioa % 0,3.
Balantze metatua
Urteko lehen hiru hilabeteetako metatuan, Industri Produkzioaren Indizea % 0,6 igo da, Energiaren % 4,4ko hazkundeak bultzatuta.
Ekipamenduko ondasunek ere bilakaera positiboa izan dute, % 3,7ko igoerarekin aurreko urteko aldi metatu beraren aldean. Kontsumo-ondasunetan, martxora arte metatutako produkzioa % 1,2 igo da, eta bitarteko ondasunetan, berriz, % 1,1 jaitsi da.
Lurralde historikoka, 2024ko lehenengo hiru hilabeteetako metatua balantze positiboarekin itxi da Gipuzkoan eta Bizkaian, produkzioak % 1,4 eta % 1,3 egin baitu gora, hurrenez hurren. Araban, azkenik, produkzioa % 1,6 jaitsi da, aurreko urteko aldi metatu beraren aldean.