Europako Batzordeak hainbat autonomia-erkidegorako REACT-EB kohesio-funtsen programako 382,7 milioi euroko partida onartu zuen atzo Espainiarentzat, eta horietatik 40,6 milioi Euskadiri dagozkio. Funtsek “susperraldia bultzatzeko eta Espainiaren trantsizio digital eta berdearen bidea errazteko” balioko dute, Batzordeak ohar batean adierazi duenez.
Kopuru horri gehitu behar zaizkio 2021ean REACT-EUri esker Espainiari emandako 10.900 milioi euroak eta 2022an bost erkidegori abenduan esleitutako 354,8 milioi euroak. Euskadira 40,6 milioi euro bideratuko dira garraio publikoan mugikortasun elektrikoa bultzatzeko, energia-eraginkortasuna hobetzeko eta eraikin publikoetan berriztagarrien erabilera handitzeko. Funtsek ospitaleak eta eskolak berritzen, gizarte- eta osasun-zerbitzuak hobetzen eta ekonomia digitalerako trantsizioa bultzatzen ere lagunduko dute.
Partida horretatik, Kataluniak 130,1 milioi euro jasoko ditu, batez ere osasun- eta hezkuntza-azpiegiturak eraikitzeko eta berritzeko, bereziki lehen hezkuntzako zentroak, Batzordeak ohar baten bidez adierazi duenez. Koronabirusaren pandemiari aurre egiteko eta ekonomia digital eta berde baterako trantsizioa bultzatzeko ere erabiliko dituzte funtsak.
Era berean, Kanariek 58,5 milioi euro jasoko dituzte, “Uharteak berreskuratzeko REACT-EUk duen laguntza osatzeko”. Funts horiek, Bruselak zehaztu zuenez, “Osasun-zerbitzuak eta ekonomia digital eta berde baterako trantsizioa hobetuko dituzte”.