Muskek Twitter erosi du 40.500 milioi euroren truke

Twitterrek atzo iragarri zuen onartu egin duela Elon Musk enpresari estatubatuarra erosteko eskaintza 40.500 milioi euroren truke, eta burtsan kotizatzeari utziko diola. Espekulazio egun baten ondoren, enpresak ohar batean adierazi zuen Musk enpresak, erakunde baten bitartez, 54,20 dolar ordainduko dituela erosketa prozesuan akzio bakoitzeko. Zuzendaritza Batzordeak aho batez onartu zuen akordioa.

“Adierazpen askatasuna demokrazia funtzional baten zimendua da, eta Twitter herriaren plaza digitala da, non gizateriaren etorkizunerako ezinbesteko gaiak eztabaidatzen diren”, esan zuen Teslaren sortzaileak eta munduko gizonik aberatsenak.

“Inoiz baino Twitter hobea egin nahi dut ezaugarri berriak dituen produktua sustatzean, algoritmoak iturri ireki bihurtzean konfiantza areagotzeko, spam botak garaitzeko, eta gizaki guztiak autentifikatzeko”, gaineratu du. Nolanahi ere, hegoafrikar jatorriko enpresariak Twitter erosteak galdera berriak sortzen ditu sare sozialaren etorkizunari buruz. Sare hori milioika pertsonak eta erakundek erabiltzen dute mezuak eta iritziak zabaltzeko, baita negozioen publizitatea egiteko ere. Sare soziala 2006an sortu zuen Jack Dorsey programatzaileak.

Eskaintzaren baldintzen arabera, Elon Muskek 54,2 dolar ordainduko dizkio eskudirutan Twitterreko akziodun bakoitzari bere titulu bakoitzeko. Horrek esan nahi du % 54ko prima dagoela Musk Twitterreko akzioak erosten hasi zen urtarrilaren 28arekin alderatuta, eta % 38koa apirilaren 1arekin alderatuta.