Nafarroako ekonomiak urte arteko % 2,1eko hazkundearekin itxi du bigarren hiruhilekoa, urtarriletik martxora bitartean izandako urte arteko ehunekoa baino hiru hamarren gutxiago. Foru BPGren moderazio hori –2022aren hasieran hasi zen eta ez da gelditu– Europako Banku Zentralak inflazioa kontrolatzeko interes-tasen igoeraren testuinguru konplexu batean azaltzen da, eta horrek eragina du sektoreetan, hala nola zerbitzuetan eta eraikuntzan.
Eskariaren aldetik, kapital-eraketa gordinaren hazkunde-erritmoa moteldu egiten da (sektore publikoaren eta pribatuaren inbertsioa), azken kontsumoan suspertze-seinaleak detektatzen dira, eta esportazioak beheranzko joeraren mende daude, Nafarroako VWko autoen ekoizpena murriztu egiten baita eta horrek eragina baitu automobilgintzaren sektorean.
Juan Cruz Cigudosa Ekonomia eta Ogasun sailburua modu birtualean agertu da Barne Produktu Gordinaren portaera erakusteko. Bigarren hiruhilekoa lehenengoarekin alderatuz gero, Nafarroa % 0,4 igo da, hamarren bat gehiago, hau da, mantendu egin da. Enpleguaren inguruan, Cigudosak gogorarazi duenez, “dinamika positiboa da oraindik, enplegua sortzen jarraitzen baita, Gizarte Segurantzako afiliatuen zifrek eta Biztanleria Aktiboaren Inkestako landunen datuek erakusten duten bezala, langabezia-tasa ehuneko hiru puntu baino gehiago murriztu baita, % 8,8ra, hiru hiruhilekotan jarraian gora egin ondoren”.